A área de Xuventude, que dirixe o edil Jorge Bustos, lanza unha nova iniciativa dentro do programa +XTi, coa que os lucenses terán a oportunidade de participar de balde en tres edicións de rutas 4x4. Esta actividade combina unha sesión teórica e unha xornada práctica completa, ofrecendo unha formación integral en condución segura e responsable.

O concelleiro animou á cidadanía a participar nesta actividade, destacando que "é unha gran oportunidade para aprender da man de profesionais e gozar dunha experiencia única no mundo do 4x4”. “Animamos a toda a mocidade e adultos interesados a inscribirse e aproveitar esta formación", engadiu Bustos.

A formación está dirixida a persoas empadroadas en Lugo de entre 18 e 49 anos, e dispón dun total de 36 prazas, distribuídas en tres edicións de 12 participantes cada unha. A sesión teórica, de asistencia obrigatoria para poder participar na ruta, impartirase os venres e incluirá contidos relacionados coa condución segura, autorrescate, copilotaxe e navegación, tendo como eixo transversal o consumo 0,0.

As datas e localizacións da actividade son as seguintes:

Primeira edición

• Teoría: Venres, 28 de marzo (15:30 - 19:30 h) no CS Uxío Novoneyra (2ª planta).
• Ruta 4x4: Sábado, 29 de marzo (9:30 - 19:30 h) con saída desde o Pavillón Municipal dos Deportes.

Segunda edición

• Teoría: Venres, 28 de marzo (15:30 - 19:30 h) no CS Uxío Novoneyra (2ª planta).
• Ruta 4x4: Domingo, 30 de marzo (9:30 - 19:30 h) con saída desde o Pavillón Municipal dos Deportes

Terceira edición

• Teoría: Venres, 11 de abril (15:30 - 19:30 h) no CS Uxío Novoneyra (2ª planta).
• Ruta 4x4: Sábado, 12 de abril (9:30 - 19:30 h) con saída desde o Pavillón Municipal dos Deportes.

A xornada práctica desenvolverase ao longo dun día completo, no que os participantes contarán con todos os recursos necesarios: vehículos 4x4, monitores especializados, tentempés e comida. Ademais, estarán sempre acompañados polos mellores profesionais do sector, garantindo unha experiencia segura e enriquecedora.

As inscricións, que abriron este mesmo luns, realizaranse a través da web www.lugomasxti.org [1] (pestana Actividades/Inscricións) ata o 20 de marzo, ás 19:00 h, ou ata esgotar prazas. A selección realizarase por rigorosa orde de inscrición.

Esta actividade enmárcase no proxecto +XTÍ 2025, organizado polo Servizo de Prevención de Drogodependencias do Concello de Lugo e financiado polo Concello de Lugo e o Plan Nacional sobre Drogas. Para máis información, as persoas interesadas poden contactar no teléfono 982 297 837.