A concelleira de Cultura, Turismo e Promoción da Lingua, Maite Ferreiro, anunciou que o Goberno de Lugo agasallará ás estudantes da Escola Municipal de Música recibirán entradas para a programación teatral do Auditorio Municipal Gustavo Freire. Con este xesto, a área de Cultura achega o teatro a todas as estudantes da Escola Municipal de Música, “achegando os distintos formatos de expresión cultural entre si”, explicou Maite Ferreiro.

A programación teatral ata final de ano conta con 7 propostas, para distintos públicos, con actuacións de grupos de teatro de recoñecida calidade que conseguiron distintos premios e con compañías emerxentes. Maite Ferreiro explicou que "esta programación está pensada para o deleite das amantes do teatro e para facilitar un achegamento a esta arte por primeira vez".

"Quixemos poñer o foco nas producións de artes escénicas de mellor calidade feitas na Galiza, que serán o fío condutor da programación, e contaremos tamén con obras internacionais de calidade contrastada", declarou a edil de Cultura.

A programación inclúe un total de 4 propostas para público adulto e 2 para familias. Para acceder ao recinto será preciso adquirir entrada no portal entradaslugo.es [1] ou de maneira presencial na oficina municipal de turismo, cun prezo de 5€ nas actividades para público adulto e 3 nas actividades familiares. Ademais, as persoas en paro, menores de 30, pensionistas e actores e actrices asociadas á AAAG terán un desconto do 30% nas actividades para público adulto.

Audio

• A concelleira de Cultura, Turismo e Promoción da Lingua, Maite Ferreiro, sobre as entradas | Descargar mp3 [2]