A Alcaldesa de Lugo, Lara Méndez, xunto á Deputada provincial de Promoción Económica e Social, Sonsoles López Izquierdo, e a Concelleira de Benestar Social, Igualdade e Inclusión, Ana González Abelleira, recibiu este sábado na casa consistorial ao líder espiritual de Senegal e fundador do muridismo, Serigne Mame Mbacke, que visita Lugo no marco dunha xira anual por distintos lugares do mundo co fin de protagonizar xornadas para fomentar a convivencia intercultural. No encontro participaron representantes da comunidade senegalesa en Lugo e no resto da provincia. A rexedora destacou Lugo como un municipio intercultural, así como o elevado grao de integración da comunidade senegalesa, que forma parte xa da sociedade lucense. Tamén recalcou a necesidade de fomentar, como é o obxectivo de Serigne Mame Mbacke con esta xira, valores como a paz, a solidariedade, a convivencia pacífica e a educación como piares básicos para o entendemento entre as persoas por encima das súas relixións e crenzas.