A Alcadesa de Lugo, Lara Méndez, mantivo este xoves un segundo encontro de traballo coa Conselleira de Medio Ambiente e Ordenación do Territorio, Beatriz Mato, para buscar unha solución ao déficit que presenta o novo auditorio de Lugo, construído pola Xunta de Galicia, en canto ao seu equipamento.

Nesta xuntanza, que a rexedora definiu como cordial, a Alcaldesa arrincou o compromiso de Beatriz Mato para buscar máis vías de financiamento xunto a outras Consellerías da Xunta de Galicia ou o propio Ministerio de Educación, Cultura e Deporte, e chegar así aos 3,6 millóns de euros da oferta existente, “para dotar a esta infraestrutura cultural, tan demandada historicamente polos veciños e veciñas, dos elementos e equipos necesarios para convertelo nun espazo que marcará un antes e un despois na vida diaria cultural, social e de lecer de Lugo”.

A Alcaldesa esixiu “canto menos e por xustiza, o mesmo trato que noutras cidades, como no caso do auditorio de Ferrol, onde a Xunta dispuxo dos dous terzos do total do financiamento”.