A Alcaldesa de Lugo, Lara Méndez, anunciou este venres que dende o Concello se solicitará unha reunión cos adxudicatarios das casetas e caldeiros do polbo, para garantir que as festas do San Froilán sigan sendo, un ano máis, as mellores festas de Galicia.

“Nesta xuntanza trasladarémoslles a importancia que teñen as nosas festas patronais para a cidade de Lugo, pola tradición das mesmas e para que os lucenses e visitantes poidan gozar destes festexos e, por suposto, tamén dun elemento tan significativo do San Froilán como é o polbo”, tal e como explicou Lara Méndez.

Ademais, a rexedora lembrou que “dende o Concello non se pode limitar a competencia, nin impedir que ningunha empresa se presentase ao proceso de licitación, pero aínda así, estamos facendo un seguimento, porque a administración sempre ten mecanismos para garantir que durante o San Froilán poidamos degustar o polbo”.

A Alcaldesa destacou que “o polbo e o San Froilán son un binomio indisociable, porque non podemos pensar no San Froilán sen pensar no polbo, igual que non podemos pensar no pobo sen pensar no San Froilán”.

Audio

• Lara Méndez, sobre a reunión cos adxudicatarios das casetas e caldeiros do polbo | Descargar mp3 [1]