A Alcaldesa de Lugo, Lara Méndez, mantivo este luns sendos encontros con representantes do Colexio Oficial de Arquitectos de Galicia, no que tamén estivo o Concelleiro de Persoal e Desenvolvemento Sostible, Daniel Piñeiro, e co Colexio de Avogados de Lugo. Tal e como deu a coñecer a rexedora, tras as reunións mantidas con asociacións veciñais, sociais e empresariais, agora é a quenda dos colexios profesionais, outro dos colectivos que contribúen de maneira significativa á dinamización da cidade.

O propósito da Alcaldesa é manter encontros con todos os colexios profesionais para coñecer de primeira man as súas achegas e propostas para Lugo. Neste senso, a rexedora insistiu en “unir forzas, crear sinerxias e coordinar estratexias de colaboración entre o sector público e o privado para aproveitar as potencialidades de Lugo e para facer cidade entre todos. Que mellor forma de conseguilo que renovando a cooperación do Concello cos colexios profesionais”.