A concellería de Muller, que dirixe Silvia Alonso, adía o espectáculo Tabú, de Carmen Conde, que tería lugar o xoves 10 de marzo, no Auditorio do Vello Cárcere (11:30 horas).

A obra nace froito das conversas recollidas con mulleres de entre 70 e 95 anos no Valmiñor, o Morrazo, o Courel, a Mariña Lucense, a Costa da Morte e o Couto Mixto sobre a súa vida erótica e sexual de xuventude. Un show de narración oral coa misión de transmitir as historias de confusión, segredismo, amor, picaresca e sexualidade (a máis cruel e a máis desexada) das mulleres que son cimento da nosa terra, as que poden explicar o que somos agora nós: fillas do Tabú. Un tendal para poñer ao clareo todas as intimidades que, neste caso, cumpre ademais unha función didáctica.