A exposición poderá verse do 17 de abril ao 2 de maio na Sala de Exposicións do Centro Social Uxío Novoneyra

O tenente alcalde, o nacionalista Antón Bao, destaca o “grande nivel artístico” da exposición e a súa “vertente solidaria”

Unha exposición colectiva de artistas plásticos da talla de Bordel, Caxigueiro, Macía, Isabel Somoza, Eduardo Zurita, Xermán Refojo ou Santiago Catalán recadará fondos para a Sociedade Protectora de Animais e Plantas de Lugo. Un total de 39 artistas cederon as súas obras para esta mostra, que será inaugurada o vindeiro martes, e na que colabora a área de Cultura do Concello de Lugo.

Na presentación desta iniciativa esta mañá, coincidindo co 34 aniversario da Declaración Universal dos Dereitos dos Animais, o tenente alcalde, o nacionalista Antón Bao, destacou “o grande nivel artístico da mostra” e a súa “vertente solidaria”. Os artistas que participan na exposición doaron as súas obras para que os beneficios obtidos pola súa venda vaian a parar á Protectora de Lugo.

Segundo explicou o seu presidente, Javier García Calleja, a Protectora lucense atente nestes momentos a máis de 400 animais. O número de animais atendidos duplicouse nos últimos dous anos, polo que a Sociedade carece dos fondos necesarios para chegar a fin de ano, segundo expuxo o seu presidente. Con esta iniciativa preténdese tamén “chamar a atención da sociedade sobre o abandono dos animais”.

Obras para todos os petos

O coordinador da exposición, Antonio Prado, explicou que esta mostra chega xa á súa sexta edición pero levaba 6 anos sen facerse. Entre as obras, todas elas de grande calidade artística, hai pintura, gravado ou fotografía de estilos moi variados, dende estilos máis clásicos a estilos vangardistas. Os seus prezos oscilan entre os 50 e os 300 euros.

A exposición poderá verse entre o 17 de abril e o 2 de maio na Sala de Exposicións do Centro Social Uxío Novoneyra.