Publicada en lugo.gal a declaración de bens patrimoniais dos 25 concelleiros da Corporación
- Tema
- Servizos xerais
A páxina web do Concello, lugo.gal [1], publica a declaración de bens patrimoniais e de causas de incompatibilidade e de actividades dos 25 concelleiros e concelleiras da Corporación. A información está dispoñible para todos os cidadáns no apartado de Transparencia da web, en Rexistro de Intereses, ano 2015.
A publicación dos datos sobre os bens patrimoniais dos edís fortalece a transparencia como piar básico da xestión municipal, que se verá incrementada coa posta en marcha dun Portal de Transparencia propio no que o Concello se atopa xa a traballar.
O Concello de Lugo está á cabeza das grandes cidades galegas en transparencia, segundo o último ránking elaborado pola prestixiosa organización Transparencia Internacional, correspondente ao ano 2014. O Goberno confía en que a puntuación será máis elevada no ranking deste 2015, tendo en conta as numerosas melloras que se introduciron a principios de ano neste eido na nova páxina web e a posta en marcha do Portal de Transparencia.