A área de Xuventude, que dirixe Ana González Abelleira, propón para mañá, 5 de decembro, Noite de Reis, un live streaming co Dj lugués Marcos Peón, co obxectivo de seguir gozando deste atípico #nadalnacasa, nesta ocasión cunha sesión de música electrónica.

A actuación arrincará ás 23:00 horas e poderá seguirse nas redes sociais oficiais de Xuventude de Lugo. A mocidade poderá conectarse a esta festa a través de calquera dispositivo de forma totalmente gratuíta. Ademais, as e os participantes poderán interactuar no chat en directo que estará aberto durante a retransmisión.

Ana González Abelleira explicou que “esta actividade é unha forma de poder gozar da Noite de Reis dentro das limitacións actuais, pero con ilusión. Esta cita é unha alternativa para seguir apostando pola diversión, o entretemento e a música para celebrar estas datas, dende a casa e con seguridade”, ao tempo que convidou a todo Lugo a sumarse ao evento.

O Dj lugués Marcos Peón, tamén productor musical, ten ás súas costas 25 anos de experiencia en cabinas e é un dos deejays galegos máis internacionais, recorrendo gran parte da xeografía española coas súas enérxicas sesións. Compartiu cabina con destacados Dj`s do panorama electrónico mundial, pinchando en países como México, Suíza, Portugal, Francia ou Romanía. Na actualidade ten máis de 15 singles no mercado, sendo o último, que comparte con Dj Frisco, un dos temas de música dance de referencia en Reino Unido, sonando nas principais emisoras de países como Ucraína, Suíza, Rusia, Colombia ou México.