A edil de Igualdade, Muller e Xuventude anunciaba hoxe a convocatoria dun concurso de Dj’s Amateurs.

“Un certame novidoso, que se inclúe dentro da programación do 1º semestre para a mocidade activa e co que queremos darlle a benvida á primavera, divulgando a cultura da música electrónica”, explicou Ana González Abelleira.

A cita, que se celebrará na Casa da Xuventude, pretende recoñecer o talento das novas xeracións de Dj´s dentro da escena local, ao tempo que terá en conta igualmente que empreguen a música como medio para motivar e desenvolver a súa creatividade.

O prazo de inscrición manterase aberto até o próximo 10 de marzo na Casa da Xuventude

“O concurso, que terá lugar o 13 de marzo de 2020, dende as 16:30 horas e ata ás 21:30 horas, consistirá na presentación e actuación de cada unha e un dos Dj´s amateurs. Poderán participar un máximo de 15 artistas e de superarse esta cifra, elixiranse segundo estrita orde de inscrición”, referiu a concelleira.

“Cada persoa realizará unha sesión dun cuarto de hora – unha duración que pode variar dependendo do número de participantes - na cal debe amosar o seu estilo, técnica e valía. Poderán presentarse mozos e mozas de 14 a 35 anos, empadroados no Concello de Lugo, ou que traballen ou estuden no municipio, cun coñecemento técnico mínimo. Cada artista só poderá actuar unha vez, xa sexa de forma individual ou como dúo e o estilo de música é de libre elección aínda que o contido das letras das cancións non poderá incluír ningunha expresión racista, sexista, ofensiva ou de mal gusto. Ademais, a orde de intervención determinarase ao azar”, indicou González Abelleira.

O prazo para apuntarse, de forma gratuíta e presencial, será ata o 10 de marzo na Casa da Xuventude, na rúa Xesús Bal e Gay, establecéndose unicamente un premio ao Dj gañador ou gañadora de 250 euros que, no caso de ser menor de idade, consistirá nun vale por material musical polo mesmo importe. Ademais, actuará dentro dalgún evento organizado polo Concello de Lugo.

Pola súa banda, a adminstración local porá a disposición das e dos concursantes dous reproductores CDJ Pioneer-2000 Nexus e unha mesa DJM-900 Nexus, mais debe ser o artista o que aporte a súa propia música, xa sexa en formato CD ou pen drive. As e os Dj’s poderán empregar, se así o desexan, a Casa da Música, situada no Parque da Milagrosa, para os seus ensaios, contando nestas instalacións con dúas mesas de mestura. Recursos que terán que solicitar con anterioridade.

Xurado de luxo

Ana Gónzalez Abelleira relatou tamén que este primeiro certame “contará cun xurado de luxo composto por Dj Frisco & Marcos Peón e Marta López”.

“Os dous primeiros teñen máis de 20 anos de experiencia en cabinas e son dous dos deejays galegos máis internacionais que xa pincharon en países como Colombia, México, Austria, Marrocos, Francia, Suíza, Portugal, Alemaña ou Tailandia, entre outros; e que recorreron gran parte da xeografía española coas súas enérxicas sesións.”

Compartiron cabina con outros Dj’s tan importantes como Gabry Ponte, Víctor Magan, Juanjo Martín, Taito Tikaro, Albert Neve, Outwork, Sak Noel, Juan Magán, Michael Mind, Chimo Bayo, Paco Pil ou Mike Platinas, ademais doutros artistas internacionais como Inna, SNAP, Tina Cousin, Elena Gheroghe, Rebeka Brown, Alexandra Stan, The Soundlovers, Fragma, Mik Inc, Ann Grace ou Hernry Méndez. Habitualmente realizan tamén unha xira co Dj de The Black Eyes Peas, Rocky Rock, campión do mundo de DMC.

“Ademais de deejays son produtores musicais, con máis de 15 temas orixinais no mercado e remezclaron a artistas internacionais como Sak Noel, Jerry Ropero, Outwork ou os mesmísimos Yolanda be Cool”, destacou a edil de Xuventude que tamén subliñou o perfil de Marta López á que cualificou como “unha das maiores promesas dentro do mundo Dj feminino de Galicia que, dende hai dous anos, compaxina a súa residencia en Lugo (na Cook) con actuacións en toda a comunidade galega”.

Máis info

• Bases do concurso de Dj’s Amateurs | Descargar pdf
• Bases do concurso de Dj’s Amateurs (RECTIFICACIÓN) | Descargar pdf

Audio

• A edil de Igualdade, Muller e Xuventude, sobre o concurso de Dj’s Amateurs | Descargar mp3