O edil de Urbanismo Sostible anunciaba hoxe que vén de asinar catro decretos autorizando ao Instituto Galego de Vivenda e Solo sendas intervencións noutros tantos edificios catalogados do Casco Histórico que contan con especial protección ao estar asentados no Burgo Medieval.

Trátase de actuacións para proceder á pintura exterior da galería nos inmobles número 20 e 22 da Tinería, da fachada do edificio número 46 desta rúa e da planta baixa do número 9 da Travesía do Miño, para as que se establece un prazo de execución de seis meses.

Miguel Couto destacaba a dilixencia coa que o servizo de Licenzas tramitou estes expedientes que entraron no rexistro o 13 de agosto e, sendo mes inhábil, se outorgaron o 20 de setembro.

“A dixitalización dos procesos está a dar xa os seus primeiros froitos, como así se desmostra en que o outorgamento dos permisos non se viu afectado polo período vacacional. E non só iso, cremos que a dilixencia amosada pon de manifesto que o compromiso deste Concello é firme non só cos proxectos anunciados e iniciados polo goberno local senón tamén cos desenvolvidos por outras administracións na nosa cidade”, sinalou o concelleiro de Urbanismo.