A Concelleira de Concello e Cidadanía, Rosana Rielo, fixo entrega este martes dos premios aos gañadores do IV Concurso de fotografía Estampas de paz e acougo, enmarcado dentro das actividades do día de Defuntos organizadas pola entidade local. Este acto tivo lugar durante o transcurso do V Concerto da Lembranza que se celebrou na Capela do cemiterio municipal de San Froilán.

A edición deste ano contou coa novidade de que os traballos podían transcender ao recinto do cemiterio municipal, polo tanto, estivo aberto a camposantos de calquera outro lugar. 

O primeiro premio, dotado con 250 euros, foi para a fotografía Chorando a Xesús de Nazaret, obra de José Marcos López Álvarez; o segundo, dotado con 150 euros recaeu no traballo de Jesús díaz Piñeiro titulado Anxo da Morte; o terceiro de 75 euros foi para Pablo Fouz Moure coa fotografía Chissst.

O xurado, que estivo formado polo fotógrafo Eduardo Ochoa, polo encargado do cemiterio municipal Serafín Saavedra e pola arqueóloga municipal Covadonga Carreño, tentou de conseguir a captación da sensación de paz e harmonía transmitida neste tipo de recintos, considerando estes traballos como os que mellor amosaban este sentimento.