O Inicia Coworking de Lugo, impulsado polo Concello e a Escola de Organización Industrial (EOI) no CEI-NODUS e cofinanciado polo Fondo Social Europeo, comezou a busca de persoas emprendedoras para a terceira edición desta iniciativa, na que se ofrece, de xeito indinvidual e gratuíto, formación e acompañamento para a posta en marcha ou consolidación de novos proxectos de caracter emprendedor e inovador.

Unha vintena de persoas poderán incorporarse a esta nova edición do programa, do que xa se beneficiaron 40 emprendedores nas dúas convocatorias celebradas ata o de agora. As persoas interesadas en sumarse a esta terceira edición poden facelo, ata o 23 de febreiro, a través da páxina web municipal, www.lugo.gal ou no enlace https://www.eoi.es/es/espacios-coworking/lugo-3a-edicion, onde hai dispoñible máis información sobre este proxecto.

A Concelleira de Economía, Emprego e Desenvolvemento Económico, Ana Prieto, destacou os bos resultados conseguidos nas dúas primeiras edicións deste programa, que supón unha oportunidade para aqueles veciños e veciñas que queiran lanzar un proxecto empresarial e poñer en marcha con éxito a súa empresa, asegurando a súa viabilidade tanto técnica como financeira. Concretamente na última fase, das 20 empresas metade xa facturan a día de hoxe.

Prieto animou a todas aquelas persoas con iniciativa e con ideas para novos proxectos a presentar as súas ideas a esta convocatoria. Entre todas as inscricións realizarase unha selección de participantes nesta terceira edición do Inicia Coworking, que se prevé iniciar en marzo e que terá lugar ata xullo nas instalacións municipais do CEI-NODUS.

Audio

• Ana Prieto, sobre o Inicia Coworking | Descargar mp3