A Alcaldesa explica ao empresariado do polígono a próxima renovación do pavimento da rúa dos Artesáns, cun orzamento de 73.600€ e da glorieta da avenida Benigno Rivera, cun investimento de 71.000€
As actuacións mellorará a seguridade e a comodidade dos conductores nunhas vías que soportan unha gran densidade de tráfico
- Tema
A Alcaldesa de Lugo, Lara Méndez, o voceiro municipal, Miguel Fernández, e o Concelleiro de Infraestruturas Urbanas, Manuel Núñez, mantiveron este luns un encontro con representantes da asociación de empresarios do polígono do Ceao, xuntanza no que lles anunciaron que o Goberno, en resposta ás súas demandas, impulsa melloras viarias nesta zona por un importe próximo aos 145.000€, en concreto, na rúa dos Artesáns e na glorieta situada na intersección da avenida Benigno Rivera e a rúa da Agricultura. As actuacións, subliñou Méndez, “mellorarán a seguridade vial e a comodidade dos conductores” destas calzadas, que, debido á gran densidade de tráfico que soportan, tanto de turismos como de vehículos pesados, atópanse deterioradas na actualidade.
O proxecto da rúa dos Artesáns consistirá na renovación do pavimento e a reposición da sinalización horizontal. O ámbito de actuación será a calzada esquerda entre Benigno Rivera e a rúa Dos Canteiros e toda a sección entre as rúas dos Canteiros e da Industria. O orzamento é de 73.600 e para o seu financiamento o Concello vén de acadar unha subvención da Consellería de Economía de 58.900€. Os 14.700€ restantes achegaraos a entidade local. O prazo de execución é dun mes.
En canto á glorieta da avenida Benigno Rivera, as obras inclúen igualmente a renovación do pavimento e a reposición da sinalización existente. O investimento é de 71.000€, que o Concello achegará a través do Plan de Barrios, e o prazo de execución, de 2 meses.
Nos dous casos, o procedemento de contratación iniciarase de maneira inmediata.
A Alcaldesa subliñou que con estas actuacións o Goberno cumpre con dúas importantes reivindicacións do tecido empresarial do Ceao. É froito tamén do convencemento de que “as infraestruturas de comunicación son vitais para que un polígono, as súas empresas, sexan competitivas, poidan seguir xerando riqueza e emprego en Lugo, en definitiva, para que teñan futuro”.
O Ceao é un dos grandes polos industriais do municipio. Da asociación de empresarios deste polígono e do das Gándaras forman parte un cento de empresas, entre as que están as que contan cun maior volume de negocio e postos de traballo.