O Goberno de Lugo instala paneis con lendas no barrio da Ponte para potenciar “o atractivo turístico da zona”

A Tenencia de Alcaldía recompilou seis lendas tradicionais da zona de Lugo, en colaboración con Antonio Reigosa, e contou coa ilustradora local Noemí López para o deseño dos paneis

Arroxo: “animamos á veciñanza a pasear polo barrio e coñecer as lendas relacionadas co Río Miño ”

Xoves, 18 de novembro de 2021
Fonte: 
Gabinete de Prensa
O Goberno de Lugo instala paneis con lendas no barrio da Ponte para potenciar “o atractivo turístico da zona”

O Goberno de Lugo vén de instalar seis paneis no barrio da Ponte, recompilando lendas tradicionais sobre a vida do barrio e sobre a cultura tradicional do mesmo. O Tenente Alcalde, Rubén Arroxo, afirmou que “queremos potenciar o atractivo turístico desta zona da cidade, que conta cunha longa historia e cun gran potencial ao atoparse na contorna do Río, ademais de contar cun gran peso patrimonial, coa Ponte Romana”.  Arroxo explicou que “realizamos esta acción recollendo as solicitudes da veciñanza da zona reclamando este tipo de instalacións para mellorar a imaxe do barrio”.

A Tenencia de Alcaldía contou coa colaboración do escritor Antonio Reigosa e da ilustradora local Noemí López para a realización desta acción. Arroxo destacou “a gran calidade das ilustracións de Noemí López e o destacable traballo de Antonio Reigosa no eido da investigación da mitoloxía popular e da tradición oral”.

O Tenente Alcalde animou a toda a veciñanza a pasear polo barrio da Ponte e “coñecer as lendas relacionadas co Río”, e destacou o compromiso do Goberno de Lugo “para achegar á veciñanza de Lugo ao barrio da Ponte conectándoo co resto da cidade, creando unha ruta peonil que remata no Cemiterio Municipal, un dos maiores atractivos turísticos da zona, recoñecido con múltiples premios a nivel estatal e internacional”.

Audio

  • O Tenente Alcalde, Rubén Arroxo, sobre o barrio da Ponte | Descargar mp3

Multimedia

  • O Goberno de Lugo instala paneis con lendas no barrio da Ponte para potenciar “o atractivo turístico da zona”

Noticias relacionadas