Lara Méndez: “todas e todos debemos contribuír á defensa do medio ambiente e a salvagardar a saúde do noso planeta porque o que está en xogo é a nosa propia saúde e o benestar dos que máis queremos e das xeracións vindeiras”.
Esa mesma xornada o edificio do Concello, na Praza Maior, lucirá de amarelo para visibilizar e sensibilizar sobre a endometriose, no Día Mundial da doenza.
- Tema
O Concello de Lugo sumarase, un ano máis, á Hora do Planeta, nun xesto simbólico que mantén dende o 2010 e co que, ademais de dar exemplo, quere crear conciencia social sobre a necesidade de conectar e ser máis respectuosos coa natureza.
Así, este próximo sábado, 27 de marzo, apagará entre as 20:30 e as 21:30 horas a iluminación pública da Casa Consistorial e tamén a ornamental da Muralla, reiterando o compromiso da institución pola sostibilidade e coa convocatoria promovida pola organización internacional WWT contra o cambio climático, o maior movemento global neste eido que conta co apoio das Nacións Unidas.
A alcaldesa, Lara Méndez, convida á veciñanza a adherirse á iniciativa cun pequeno gran aceno como apagar a luz unha hora esa tarde, co fin de que “todas e todos contribuïamos á defensa do medio ambiente, unha responsabilidade que nos incumbe e nos afecta, de forma xeral, como sociedade”, afirmou.
O 2021 está considerado como o inicio dunha década clave para a biodiversidade, cando terán lugar os Cumios de Kunmin o de Glasgow, e especialmente despois de comprobar como durante a pandemia a natureza é o principal soporte vital, capaz de brindarlle á humanidade todo aquelo que precisa para a súa supervivencia.
“Os concellos, como administración máis próxima á veciñanza, desenvolvemos, ao igual que noutras moitas facetas, un papel clave para impulsar o cambio cara a transición ecolóxica. Por iso, unha vez máis – subliñou a rexedora - queremos facer fincapé na importancia que ten coidar aquilo que nos rodea e salvagardar a saúde do noso planeta porque o que está en xogo é a nosa propia saúde e o benestar dos que máis queremos e das xeracións vindeiras”, destacou Lara Méndez.
A alcaldesa explicou tamén que, a excepción do tempo que dure esta Hora do Planeta, o edificio do Concello, na Praza Maior lucirá, esa xornada de cor amarela, a identificativa da propia doenza, para visibilizar a endometriose.
Unha enfermidade que afecta ao 10% das mulleres en idade fértil, ao redor de 60.000 galegas, e sobre a que se pretende sensibilizar, coincidindo coa celebración do seu Día Mundial e, en resposta á petición trasladada pola Asociación “querENDO. Mulleres con endometriose”.