O Concello organiza unha nova edición do curso de formación de monitores para a prevención

Martes, 13 de novembro de 2007
Fonte: 
Gabinete de Prensa

Por segundo ano consecutivo, o Servizo Municipal de Prevención de Drogodependencias organiza un curso de formación de monitores para prevención dende o tempo de lecer que arrincará no mes de marzo e para o que o luns abre a inscrición.

O curso constará de setenta horas dividíndose en 50 de formación teórica e 20 de práctica.

Debido ao éxito experimentado o ano pasado, formaranse tres grupos con distintos horarios de clases. O primeiro será os venres de catro a nove, o segundo os sábados de nove a dúas e o terceiro na tarde do sábado co mesmo horario que os venres.

A inscrición no curso pode realizarse dende o luns até o 28 de febreiro e é totalmente gratuíto. O lugar no que presentar a documentación para a inscrición é o Servizo de Prevención de Drogodependencias, no Centro Social Uxío Novoneyra. Deberá presentarse a folla correctamente cuberta acompañada da fotocopia do DNI e dunha foto carné.

A inscrición realizarase por orde de entrada e terán preferencia aqueles que non realizaran o curso con anterioridade.

A lista de admitidos publicarase o día 2 de marzo e poderá comezarse co curso o día 9, para o primeiro grupo, e o 10 para o segundo. Está previsto que a parte teórica remate entre o 25 e o 26 de maio e a práctica o 22 e 23 de xuño. A entrega de certificados será o día 26 dese mesmo mes.

Os interesados en obter información sobre o curso poden facelo a través da web www.prevenciondrogas.lugo.es ou no número de teléfono 982 28 48 16.

Este curso está organizado polo Concello de Lugo, a través da Concellería de Muller e Benestar Social, que dirixe Carmen Basadre, e financiado polo Plan Nacional de Drogas.

Noticias relacionadas