O mércores, 9 de setembro. Esa é a data na que o Concello de Lugo ten previsto iniciar, de forma subsidiaria, os labores de desentullo do inmoble número 48 da Rolda da Muralla, para garantir a estabilidade do edificio e a seguridade cidadá.

O edil de Urbanismo Sostible, Miguel Couto, explicaba hoxe que a Xunta de Goberno Local desta semana autorizará o comezo dos traballos que, “segundo o proxecto elaborado por Evislusa, consisten no apeo da estrutura, o arriostramento de muros, a retirada de cascallos e a recuperación dos elementos catalogados cos que conta a construción. Operacións orzamentadas en 48.173’11 euros, das que se encargará a empresa Aldariz Ferreiro e para as que dispón dun prazo de 6 meses”.

O concelleiro indicou tamén que na mesma sesión o executivo procederá a desestimar os recursos de reposición presentados polas propietarias do edificio "ao non axustarse as súas argumentacións ao obxecto dos requirimentos municipais e por non gardar relación co preocupante estado de conservación no que se atopa a vivenda nin á necesidade urxente de dar cumprimento íntegro as obras ordenadas, xa en 2005, para reverter a súa situación tan lamentable“.

“Comeza pois, a conta atrás para materializar unha intervención que as propias donas da edificación levan pospoñendo, incomprensiblemente, 15 anos, tempo no que de forma reiterada e neglixente desoíron os chamamentos da administración local” e lembrou que, dende o 2001, ano no que se advirte por primeira vez da necesidade de actuar sobre a mesma, o Servizo de Urbanismo emitiu máis dunha trintena de resolucións, instándoas a corrixir as deficiencias detectadas.

Couto recordou, así mesmo, que, até o momento, o Concello impuxo un total de oito multas coercitivas ao respecto por importe de 43.000€ sen que causaran efecto algún, “polo que, non nos quedou outra alternativa que solicitar a oportuna autorización xudicial para rematar, dunha vez por todas, o procedemento”, sostivo.

“O noso principal obxectivo é garantir a protección dos viandantes e, precisamente por iso, o próximo día 9 persoal do Servizo de Arquitectura e da Empresa Municipal de Vivenda e Solo, acompañados por efectivos da Policía Local, acudirán, ás nove da mañá para supervisar o inicio das obras para o que, dende o Concello, lles pedimos ás titulares da edificación a máxima colaboración, co fin de que faciliten a entrada, anunciándolles tamén que, de non ser así, se accederá igualmente á mesma en virtude da autorización outorgada en decembro polo Xulgado do Contencioso Administrativo número 2 de Lugo. O arranxo é xa inaprazable”, concluíu o edil de Urbanismo Sostible.

Audio

• Miguel Couto, sobre o inmoble nº 48 da Rolda da Muralla | Descargar mp3