O Concello de Lugo está a crear un novo pulmón verde na zona urbana coa plantación de máis de 15.000 árbores en 14 hectáreas de terreos públicos das Gándaras a través do programa Lugo+Biodinámico, financiado con fondos europeos Life. Esta foi unha das cuestións abordadas durante as reunións que mantiveron ao longo da mañá deste venres na sala de usos múltiples do Edificio de Novas Tecnoloxías os integrantes dos comités de dirección e de xestión e seguimento deste plan, que, dotado con un orzamento total de 3,5M€ e que conta coa colaboración das universidades de Santiago e Politécnica de Madrid e a Deputación de Lugo, inclúe novidosas iniciativas en favor dun urbanismo sostible e dun mellor aproveitamento da riqueza forestal, a nivel económico e ambiental.

A plantación das 15.000 árbores foi unha das accións do Life desenvolvidas o pasado ano. Deste xeito, sementouse un souto con 286 castiñeiros autóctonos en 3,6 hectáreas; 5.315 exemplares de pradairo, carballo, cerdeira e freixo en 4,1 hectáreas; cultivos enerxéticos (9.000 unidades de chopo e miscanthus giganteus –un pasto cun alto rendemento en biomasa- para a producción de biocombustibles sólidos en formato de estelas nunha hectárea de superficie; ademais de acondicionarse unha plantación única, con medio milleiro de árbores e arbustos autóctonos de 55 especies distintas, representativas de todos os bosques de Galicia en 5 hectáreas (denominada arboretum).

Con estas iniciativas, e en xeral con toda as medidas incluídas no Lugo+Biodinámico, o Concello sitúase á vangarda da planificación urbana sostible e dun mellor aproveitamento forestal, o que mellorará a calidade de vida da veciñanza e abrirá novas oportunidades económicas.

Outras das accións que se levaron a cabo o ano pasado dentro deste plan foi a adhesión do Concello de Lugo á iniciativa europea Pacto dos Alcaldes pola Adaptación ao Cambio Climático, ademais de acometerse traballos de conservación e recuperación do humidal das Gándaras e avanzar na súa declaración como Espazo Natural de Interese Local (ENIL).

En canto ás próximas actuacións, planificadas nas reunións dos comités celebradas hoxe, destaca a elaboración dun catálogo de solucións de deseño urbano que contribúan a sostibilidade ambiental e a construción dun edificio con consumo enerxético cero.

O comité de dirección de Lugo+Biodinámico está presidido pola Alcaldesa, Lara Méndez, e del forman parte o Concelleiro de Desenvolvemento Sostible, Daniel Piñeiro, e as edís de Economía, Benestar Social e Cultura, Ana Prieto, Ana González Abelleira e Carmen Basadre, respectivamente, ademais de un representante da Deputación, a USC, a Universidade Politécnica de Madrid, a empresa municipal Evislusa e un funcionario que exerce a labor de secretaría. O comité de seguimento está composto por Daniel Piñeiro e igualmente por representantes de Deputación, USC, UPM e Evislusa.