O Concello continúa a dar pasos para incorporar ao vieiro urbano os tramos de dúas estradas provincias nas proximidades da capital.

O executivo de Lara Méndez aceptaba esta mañá, en Xunta de Goberno, a entrega, por parte da Deputación de dous tramos, de pouco máis dun quilómetro cada un, da LU-P- 2902, na Ponte de Ombreiro, e da LU – P – 2924 nos accesos á estrada deste núcleo,  nas Saamasas, cos que o Concello pretende darlle continuidade ao Paseo de Palestina, unificando a titularidade destes viais que se atopan nunha contorna urbana.

“Trátase do treito inicial da LU-P-2902, cunha lonxitude de 1.034 metros, e da LU-P-2924 na súa totalidade, que abrangue tanto un traxecto de 628 metros, con inicio na vía anterior  e final na rúa dos Deportes, así como un ramal de 420 m. que parte do itinerario principal e remata na intersección coa LU-P-2902”, abondou o edil de Urbanismo Sostible. “En total 2’082 km que pasarán a integrarse no rueiro da cidade e que nos permitirán exercer un mantemento continuado sobre os mesmos e garantir o seu estado de conservación nas condicións máis axeitadas tendo en conta que se trata de vías de conexión moi importantes, que prestan un gran servizo e que son empregadas diariamente por moitas veciñas e veciños de Lugo”.

Miguel Couto explicou que “este trámite de aceptación é imprescindible para que o organismo provincial poida remitir, para a súa autorización, ao Consello da Xunta de Galicia a solicitude realizada pola administración local para incorporalas ao Inventario de Bens Municipais, ao afectar a cesión só a un tramo parcial das mesmas. Porén, ata a publicación do decreto de aprobación no DOG non será posible a materialización deste traspaso”, indicou.

Por outra parte, na sesión desta semana, o equipo de goberno concedeu tamén 4 licenzas urbanísticas, entre elas a reforma do IES Muralla Romana de Lugo, na que a Consellería de Educación empregará 360.063’73 € para, entre outras actuacións, pechar o polideportivo, dotalo de vestiarios e converter o actual ximnasio en talleres de formación de estética e perruquería, para o que dispón dun ano.

Igualmente autorizouse un parcelamento de terras na parroquia de Pías e a construción de sendas vivendas unifamiliares, unha no no núcleo de Casás (150.725’31€) e outra en Piúgos

(280.810’58€), as dúas cun prazo de execución de 36 meses.

Ademais, esta mañá foron aprobadas as prórrogas dos contratos, dependentes da área de Medio Ambiente, para o control de pombas na cidade, que asume dende 2015 a empresa Agronerga por importe de 10.514’90 euros anuais, así como o dos servizos de prevención e control da lexionelose nas instalacións municipais e a desinfección, desinsectación e desratización, que asume Sanal cun custo por exercicio de 35.090 €.

Audio

• O concelleiro de Urbanismo Sostible, Miguel Couto, sobre a cesión dos tramos de Ombreiro - As Saamasas | Descargar mp3