A Xunta de Goberno aprobou inicialmente este mércores o estudo de detalle formulado pola Consellería de Educación para a ordenación de volumes no CEIP das Mercedes, situado entre as rúas Montirón e Novo Freire, dentro das obras de ampliación que se van a realizar neste centro educativo.

O Concello estaba pendente de recibir por parte da Consellería este estudo de detalle, cos obxectivos de completar ou reaxustar as aliñacións e as rasantes, ordenar os volumes edificables e concretar as condicións estéticas e de composición das edificacións complementarias do planeamento.

O Voceiro municipal, Miguel Fernández, explicou que “a documentación chegou ao Concello o 15 de xullo por mensaxeira, momento dende que a entidade local axilizou o máximo posible os trámites”, polo que “este é un exemplo ben claro da celeridade coa que actúa o Goberno municipal, ante un asunto de tanta importancia para a cidade, mentres outras institucións non funcionan coa mesma axilidade e incluso poñen atrancos”.

Agora, seguindo os prazos legais establecidos, este estudo sométese a exposición pública polo prazo dun mes, co obxecto de que poida ser consultado, polo que será publicado no DOG, para que posteriormente poida ser aprobado definitivamente.

Audio

• Miguel Fernández, sobre a Xunta de Goberno | Descargar MP3