O Alcalde de Lugo, José López Orozco, presidiu o acto central do Día Mundial da Fibromialxia, que se celebrou diante do Concello e que estaba organizado polas asociacións Alufi e Adafi para chamar a atención da sociedade sobre a incomprensión que sofren as persoas afectadas por esta enfermidade. No acto participaron diferentes membros da Corporación municipal en apoio ás persoas que sofren esta enfermidade.

López Orozco foi o encargado de ler o manifesto conmemorativo que nesta ocasión quere render homenaxe ao traballo que desenvolven as asociacións ao longo destes 14 anos para visibilizar e concienciar á sociedade desta enfermidade. Ademais, indicou que “eu como Alcalde e en nome da Corporación quero dar as grazas polo traballo que levan feito durante estes anos xa que colaboraron en concienciarnos a todos da enfermidade e non deixan de traballar para poder saír da súa situación e porque nestes anos seguro que co seu traballo e esforzo melloraron as cousas”.

Ademais o manifesto deste ano recoñece os logros acadados nestes e no que denuncian as desigualdades e inxustizas que perduran, “solidarizámonos con todas as persoas diagnosticadas de Fibromialxia nesta época de crise que ameaza os piares do Estado de Benestar, e reclamamos unha sanidade xusta e equitativa para todas as persoas, para evitar a obscenidade que representaría crear ou manter situacións de exclusión nun momento no que a persoa é mais vulnerable: cando perde a saúde.”

No Día Internacional da Fibromialxia, as persoas afectadas tamén reclaman cinco garantías “como son o acceso universal ao Sistema público sanitario e social dos e das pacientes de fibromialxia así como a calidade e a equidade do sistema en todas as Comunidades Autónomas, mediante tratamento e prevención, criterios de avaliación de discapacidades e invalideces, medidas de inserción laboral e dereitos a prestacións sociais se corresponde”. Tamén piden garantir o principio de corresponsablidade na planificación das políticas sanitarias e sociais e os Plans Directores de aplicación; garantir a representatividade das asociacións de persoas afectadas e o recoñecemento da súa labor social; a investigación pública e o fomento da investigación privada, co obxectivo de descubrir a orixe, mellorar os tratamentos e previr a enfermidade; e por suposto, garantir o respecto cara as e os pacientes, familias e profesionais que traballan e se forman para ofrecernos unha mellor atención.

Audio

• O Alcalde no manifesto do Día da Fibromialxia | Descargar mp3