A película explica as secuelas da prohibición total do aborto vixente neste país, un dos seis no mundo no que a interrupción do embarazo é ilegal en todas as circunstancias.
Producida polas ONG’s Agareso e ACPP, con profesionais lucenses nos seus equipos xunto coa entidade dominicana IDAC, proxectarase o venres, 4 de marzo A entrada é libre.
O executivo de Lara Méndez, a través da concellería de Muller e Igualdade, que dirixe Silvia Alonso, trae a Lugo en estrea o documental galego ‘Garantía de Vida’, que denuncia as consecuencias da ilegalización do aborto en República Dominicana.
A peza, producida polas ONG’s Agareso e ACPP, con profesionais lucenses nos seus equipos xunto coa entidade dominicana IDAC, proxectarase o venres, 4 de marzo, ás 20.30 horas, no auditorio do Vello Cárcere, precedida pola inauguración ás 20.00 horas dunha exposición fotográfica. A duración é de 43.30 minutos e a entrada é libre ata completar aforo. Posteriormente haberá un coloquio.
O filme, que xa se reproduciu en Vigo e en Santiago, denuncia as secuelas que ten sobre a vida das mulleres a prohibición total do aborto vixente na República Dominicana, un dos seis países no mundo no que o aborto é ilegal en todas as circunstancias. É, tamén, o país de América Latina con máis matrimonios infantís e adolescentes e documenta, cada ano, unhas 25.000 complicacións hospitalarias relacionadas directamente co aborto clandestino.
Por mor desta situación, o movemento feminista dominicano demanda que, polo menos, se despenalice o aborto en tres supostos: cando o feto é inviable para a vida, cando corre perigo de morte a nai e cando o embarazo é froito dunha violación.
O documental nace da premisa de que a loita feminista é unha loita global e busca unir esforzos dende Galicia co movemento feminista dominicano para crear conciencia ao redor da necesidade de defender os dereitos sexuais e reprodutivos das mulleres e incidir para que se modifique a lei que penaliza o aborto en todos os seus supostos na República Dominicana. Nel, familias das vítimas e as propias vítimas contan as súas testemuñas e piden que se garanta a vida das mulleres por riba de calquera outra cousa. Rosa, Onelis, Jenifer, Arelis e Katiusca decidiron plantarse diante da cámara con toda a súa rabia e a súa dor, non por elas, senón polas que están por vir, para que ninguén máis teña que pasar por iso.
‘Garantía de vida’ é un documental cun obxectivo social que pon en valor a loita do movemento feminista dominicano, un movemento integral e integrador que desembocou na mobilización feminista máis importante da historia dominicana o 23 de maio do 2021.
A película complétase cunha mostra, que contén 12 imaxes e mensaxes que as protagonistas do documental queren facer chegar a través da súa testemuña.
Máis info
- Cartel do documental ‘Garantía de Vida’ | Descargar pdf