Mobilidade abre a cidade ao Río Rato

Rubén Arroxo fixo balance das actuacións realizadas pola área de Mobilidade que melloraron as conexións da cidade coa zona do Río, que contaron cun investimento total de 132.842€.

Arroxo: “as actuacións feitas no Barrio Xuíz, no carril do Xuízo e na rúa Virxe da Esperanza permitiron mellorar no último ano o acceso a unha das zonas de paseo máis utilizadas pola veciñanza”

Sábado, 13 de febreiro de 2021
Fonte: 
Gabinete de Prensa
Mobilidade abre a cidade ao Río Rato

O Tenente de Alcalde e responsábel da área de Mobilidade e Infraestruturas, Rubén Arroxo, fixo balance das actuacións realizadas no último ano para mellorar a conexión da cidade coa zona do Río Rato. Arroxo explicou que “desde a área de Mobilidade tratamos de mellorar o acceso ao Rato ao mesmo tempo que dabamos solucións á mobilidade, mellorando tamén a calidade de vida da veciñanza”.

A área de Mobilidade actuou no último ano no Barrio Xuíz, mellorando o estado de todos os viais dunha zona próxima ao río, que se atopaba nun avanzado estado de desgaste. Nos últimos meses, realizouse tamén a mellora do asfaltado do Carril do Xuízo, onde se mellorou a adherencia do vial, substituíndose o asfalto na parte inferior, que chega á zona do río. Por último, vense de rematar o asfaltado da rúa Virxe da Esperanza, que une Montirón con San Fiz e o Paseo do Rato.

En total, o Concello de Lugo investiu 132.842,69€ “que foron adicados á mellora da calidade de vida da veciñanza de cada zona da cidade e ao mesmo tempo á mellora dunha das zonas verdes máis importantes de Lugo”, segundo explicou Rubén Arroxo. O Tenente de Alcalde lembrou que “coas restricións de mobilidade actuais, o Paseo do Rato estase a converter nunha das zonas máis utilizadas polas veciñas e veciños para practicar deporte e pasear, e desde o goberno municipal queremos facilitar que toda a veciñanza poida acceder á zona”.

Multimedia

  • Mobilidade abre a cidade ao Río Rato

Noticias relacionadas