O Tenente de Alcaldesa, Miguel Fernández, anuncia que logo de realizar un estudo sobre o estado real das áreas de xogo, o Concello levará a cabo un programa de actuacións por fases e barrios que inclúe a creación de novos espazos.
As conclusión do informe apuntan a que o deterioro dos recintos garda relación coa súa antigüidade, co vandalismo e tamén coa baixa calidade dos materiais que empregaron os promotores privados na súa construción.
Na actualidade, a capital dispón de 80 zonas infantís e biosaudables, ao redor do 20% reformadas ou construídas durante o mandato de Lara Méndez.
O Goberno de Lara Méndez, a través da área de Medio Ambiente que dirixe o tenente de alcaldesa Miguel Fernández, prepara a elaboración dun Plan de Intervención e Mellora dos parques infantís e biosaudables da cidade co que o Concello de Lugo quere abordar a renovación destes espazos.
“Nestes momentos, e logo de encargar un primeiro informe sobre a situación real de todas as áreas de xogo da capital, dende a área de Medio Ambiente estamos en disposición de poder facer un diagnóstico inicial sobre o seu estado de conservación”, indicou Miguel Fernández.
O concelleiro avanzou que as conclusións dese análise “apuntan a que factores como a antigüidade ou os materiais de construción resultan determinantes no grao de afectación que sofren as dotacións da capital” e sinalou, como exemplo, que os parques con peor cualificación técnica son os situados na Rolda das Mercedes con Xosé Castiñeira ou río Mandeo, que xa teñen 18 anos, ou os que se atopan en San Fiz, que datan de 2005.
“Cómpre subliñar – incidiu Miguel Fernández – que o 47’5% destas instalacións teñen 15 anos ou máis e que unha porcentaxe destacable dos mesmos foi executada por promotores privados no desenvolvemento de unidades de actuación e, posteriormente, cedidos ao Concello para o seu mantemento sendo, na súa gran maioría, de baixa calidade o que provoca continuos labores de coidado e reposición”.
O estudo permitiu coñecer, ademais, que as principais incidencias detectadas gardan relación coas pintadas e coas roturas que se producen no valado perimetral e no firme, froito das inclemencias meteorolóxicas, o paso do tempo ou dos actos vandálicos e que a empresa encargada do mantemento arranxa as incidencias no mesmo día que se comunican, salvo que sexa preciso repoñer algunha peza que dependerá da demora do seu envío.
“Todos estes datos nos permitirán deseñar, agora, unha planificación por fases e barrios para atallar as eivas derivadas do avellentamento destas infraestruturas así como dar resposta ás necesidades das que adoezan como pode ser a reparación dos peches, substitución do pavimento ou a incorporación de pezas e bambáns inclusivos, superando os 119 que temos instalados actualmente”, explicou Miguel Fernández.
O tenente de alcaldesa asegurou tamén que “o Plan contempla, así mesmo, a creación de novas zonas de esparexemento co fin de garantir unha oferta de ocio axeitada pero non só para as crianzas, senón dirixida a todos os públicos. Isto implica unha transformación moito máis completa e unha reformulación do propio concepto dos parques infantís - tanto dos futuros, como dalgúns xa existentes - tal e como os coñecemos agora, que deixarán de ser un lugar pensado só para nenos e nenas e comezarán a exercer unha función moito máis integradora na que grupos de todas as idades gocen de espazos propios pero tamén doutros compartidos que predispoñan á convivencia e á solicialización interxeracional”, abondou o edil de Medio Ambiente.
O tenente de alcaldesa informou, igualmente, de que todos estes traballos “se levarán a cabo segundo a urxencia das deficiencias atopadas e do uso e afluencia de público que teñan as instalacións, de forma que ningún barrio de Lugo resulte alleo a esa supervisión e ningunha área infantil quede desfasada”, aclarou Fernández.
“O control será continuo o que tamén permitirá priorizar a celeridade coa que se debe emendar o seu deterioro”, incidiu o concelleiro de Medio Ambiente.
En total, Lugo conta con 80 parques infantís e biosaudables distribuídos por toda a capital, dos que ao redor dun 20% foron rehabilitados ou construídos durante o mandato de Lara Méndez, como o recentemente inaugurado en Novo Freire ou os da Praza de Bretaña e Agro do Rolo.
Logo da remodelación que experimentaron os situados na Praza da Milagrosa, Aquilino Iglesia Alvariño, Campo Castelo, Albeiros e Parque de Rosalía, o executivo municipal traballa, neste intre, na reforma do de Augas Férreas que disporá dunha cuberta para incrementar a súa versatilidade durante todo o ano.
Audio
- O edil Miguel Fernández, sobre o Plan de Intervención e Mellora dos Parques | Descargar mp3