A Alcaldesa de Lugo, Lara Méndez, e o Presidente da Deputación, Darío Campo, presentaron este mércores a 40 edición do Rally San Froilán, que terá lugar os vindeiros días 27 e 28 de outubro. Fixérono acompañados do Concelleiro de Deportes e Medio Rural, Miguel Fernández, o Deputado de Deportes, Pablo Rivera, a Subdelegada do Goberno, Isabel Rodríguez, e os Alcaldes dos Concellos de Friol, Meira, Pol e Outeiro de Rei, municipios polos que transcorrerá a proba. No acto tamén participou a Vicepresidenta da Escudaría Miño, Mayte Vilanova, e o Presidente da Escola PTC, Antonio Solórzano.

O Goberno do Concello e da Deputación son os principais patrocinadores da cita, que reunirá a 105 pilotos, entre os que se atopa Víctor Senra, o actual campión galego, que competirá polo título con Alberto Meira e Iago Caamaño. Xunto a eles atópase Adrián Díaz, campión do Rally San Froilán 2017.

Lara Méndez e Darío Campos coincidiron en  subliñar que “esta competición supón unha oportunidade única para a dinamización de Lugo, pois congrega de media a uns 40.000 espectadores, cun retorno económico estimado dun millón de euros para a provincia, segundo a propia organización”.

As cifras do rally

Segundo a organización do 40 Rally San Froilán, o evento terá unha importante repercusión na economía de Lugo, xa que producirá un retorno económico de preto dun millón de euros, que beneficiará sobre todo aos concellos polos que transcorrerá o evento. O sector hoteleiro incrementará a súa demanda de aloxamento durante os dous días de duración dos actos desta cita automobilística, coa reserva de arredor de 150 habitacións dobres, e os establecementos de hostalería verán tamén notablemente aumentados os seus beneficios.

Percorrido

O 40 Rally San Froilán, puntuable para o Campionato Galego de Rallys, estará formado por un percorrido de 378,35 quilómetros dos cales 91,73 quilómetros corresponden a 8 treitos cronometrados por estradas asfaltadas pechadas ao tráfico. A proba constará de dúas etapa dividida en cinco seccións:

TREITO                                               1ª PASADA             2ª PASADA

A - OUTEIRO DE REI                          08:53                           12:06

B - FRIOL                                           09:16                           12:29

C – MEIRA                                           17:17                           20:12

D - POL                                              17:45                           20:40

Na xornada do venres 26 levaranse a cabo as correspondentes verificacións técnicas e administrativas. O sábado 27 será a xornada na que se disputará o rally, o cal comezará ás 08:00 horas coa saída do primeiro participante da primeira das seccións. Ás 10:28 horas sairá o primeiro participante da segunda sección e ás 14:20 horas terá lugar a saída do primeiro participante da terceira sección. Ás 18:54 horas, o primeiro participante da cuarta sección tomará a saída. Ás 00:00 horas publicaranse os resultados da proba.

Normas básicas de seguridade

A organización do Rally recordou aos afeccionados a importancia de situarse en lugares fose de perigo, é dicir, lonxe da posible traxectoria dunha saída de estrada dos participantes e, sobre todo, non situarse diante de lugares sólidos como muros de pedra, valla, vehículos, árbores, colectores, etcétera. Así mesmo, solicitou a máxima colaboración para intentar cumprir e respectar en todo momento as medidas establecidas, respectando e obedecendo as recomendacións dos Comisarios, Protección Civil e Forzas de Seguridade.