Lugo celebrou este sábado o Día do Libro cunha lectura pública da obra de Cervantes, El Quijote, que tivo lugar na Praza Maior, diante da Casa do Concello, dende as 12:00 ás 14:00 horas. A Alcaldesa de Lugo, Lara Méndez, e a Concelleira de Cultura, Turismo, Xuventude e Promoción da Lingua, Carmen Basadre, participaron nesta lectura coa que o Concello, coa colaboración de Ágora Cultural, rende homenaxe a Cervantes no IV centenario da súa morte. Ao longo da mañá foron medio cento de persoas de todas as idades, as que quixeron poñer voz ás palabras escritas por Miguel de Cervantes.

En xornada de tarde, a partir das 18:00 horas e ata as 20:30 horas, terá lugar unha quedada para ler poemas de Manuel María na Praza Maior. Todos os que queiran participar poderán elixir o poema que queiran ler. A actividade enmárcase dentro dos actos que o Concello programou ao longo do ano para render homenaxe a este escritor ao que se lle dedican este ano as Letras Galegas.