Lugo é, segundo o Ministerio de Facenda, a capital galega que paga con maior axilidade as súas facturas

O Executivo local mellorou en 2021 o período medio de pago estimado nun 16% e rebaixou o PMP de novembro até os 10’71 días, mentres que Pontevedra se sitúa nos 26’79 e Ourense nos 40’32.

O Concello abonou no último trimestre do pasado exercicio máis de 21’4 millóns de euros aos provedores municipais.

Xoves, 24 de febreiro de 2022
Fonte: 
Gabinete de Prensa
Lugo é, segundo o Ministerio de Facenda, a capital galega que paga con maior axilidade as súas facturas

O Goberno de Lara Méndez abonou entre outubro e decembro un total de 1.887 facturas, principalmente a pequenos e medianos provedores, por valor de 21.474.156 euros, o 78% deste importe dentro do prazo legal establecido.

Esta é a principal conclusión – segundo sinalou a edil de Gobernanza - do informe de morosidade do cuarto trimestre do 2021, no que tamén se pon de manifesto a solvencia económica da administración local que no pasado exercicio conseguiu rebaixar o período medio de pago estimado (PMPE) nun 16%, até os 44’70 días, dentro dos 60 que determina a lei.

A responsable da área económica explicou que esta cifra aínda diminúe máis cando o que se se contabilizan son os días que transcorren dende que se aproba o gasto ata que se materializa o seu pago efectivo (PMP), un dato que en decembro chegou a baixar até os 6’86 días (cando o prazo legal establecido é de 30 días).

“Somos así, segundo reflicten os propios datos publicados polo Ministerio de Facenda correspondentes ao mes de novembro, a Administración local máis dilixente de toda a comunidade á hora efectuar estes pagos, fronte aos 40’32 días que tardou o Concello de Ourense, os 32’84 días de Santiago ou os 26’79 que rexistra Pontevedra”, referiu a tenente de alcaldesa.

“O documento constata que durante o pasado exercicio, grazas á implantación dos protocolos de traballo internos que estamos a aplicar, fomos quen de incrementar a cantidade de diñeiro que se paga en prazo aos provedores municipais”, indicou Paula Alvarellos, que tamén destacou que a maioría das facturas que quedan pendentes pertencen ou ben ás grandes compañías de subministración eléctrica e gas – pola súa especial dificultade na conformación – ou se corresponden con demoras nas que incorren as propias empresas á hora de presentar as facturas.

Audio

  • A edil Paula Alvarellos, sobre o informe de morosidade, do 4º trimestre do 2021 | Descargar mp3

Noticias relacionadas