O vindeiro luns o Concello de Lugo disporá dos novos orzamentos.

“En total 100.061.680’84 euros que servirán para acometer proxectos importantes, obras comprometidas xa en anos anteriores e moi agardadas pola cidadanía que contribuirán a crear o Lugo que queremos dentro da segunda gran trasformación que planificamos para a cidade durante o mandato anterior e que inclúe actuacións tan relevantes como a substitución das canalizacións máis antigas, a construción da pasarela sobre a Nacional VI, a recuperación do Carme e a súa posta en valor, ademais doutras moitas medidas de carácter social que redundarán na mellora da calidade de vida da veciñanza”, subliñou a alcaldesa.

As contas do 2020 sairán publicadas este venres no Boletín Oficinal da Provincia de maneira que entrarán en vigor no seguinte día hábil que, por tratarse da véspera da fin de semana, corresponderá ao vindeiro luns, 13 de xaneiro.

“O seu anuncio no BOP de mañá trátase do derradeiro trámite que permitirá a administración local comezar a dispoñer de todos eses cartos de maneira que o prazo de execución que terán estes orzamentos será integramente o do ano, por primeira vez nos últimos cinco exercicios o que suporá – estamos seguros – acadar un maior nivel de investimento na cidade e, por tanto, de materialización de todas aquelas intervencións que xa tiñamos programadas”, indicou Lara Méndez.

A rexedora lembrou que as contas de 2020 contemplan un total de 11 millóns de euros de investimentos reais, aos que hai que engadir os dez millóns e medio que se incorporaron en outubro procedentes dos remanentes de crédito e que, entre outras, terán como finalidade a peonalización de Quiroga Ballesteros, o repintado da sinalización viaria ou a construción do saneamento en puntos do rural.

“Estes presupostos permitirán, asemade, destinar 28 millóns a Políticas Sociais, 8 a Emprego, para acadar o impulso e a dinamización económica a través do emprendemento, dos que 700.000€ se destinarán especificamente a un programa dirixido a persoas en risco de exclusión, ademais de 3’3 millóns, que serán para o apoio ao deporte e o fomento da saúde e 1’1 millóns para a substitución de canalizacións de fibrocemento na capital”.

Lara Méndez, destacou igualmente o feito de que durante o proceso de alegacións, que rematou o pasado martes, 7 de xaneiro, non foi presentada nin unha soa reclamación ao respecto nin por parte de colectivos ou particulares, nin tampouco pola dos grupos da oposición que se ben, non apoiaron estas contas, como vén sendo costume, tampouco achegaron, nos cauces establecidos, ningunha outra proposta para modificalas”.

Algo similiar ao que aconteceu coa actualización de varias Ordenanzas, aprobadas inicialmente no Pleno de outubro e xa en vigor dende o pasado día 1, debido a que non recibiron ningunha alegación sobre as mesmas a pesar do rexeitamento expresado pola oposición pero que non se traduciu en ningunha outra aportación máis.

Audio

• A alcadesa Lara Méndez, sobre a entrada en vigor dos orzamentos | Descargar mp3