A Alcaldesa de Lugo, Lara Méndez, o director de Relacións Institucionais e Coordinación Territorial da Fundación Telefónica, Joan Cruz, e a directora de Telefónica en Galicia, Marta Menéndez, anunciaron este martes, na Sala de Usos Múltiples do Edificio de Novas Tecnoloxías, a apertura da inscrición para un curso gratuíto de ciberseguridade, impulsado por dita fundación coa colaboración do Concello. Trátase do primeiro curso destas características que celebra a Fundación Telefónica en Galicia.

No acto, no que tamén estivo presente a Concelleira de Concello e Cidadanía, Rosana Rielo, a rexedora fixo fincapé nos beneficios que traen consigo as sinerxias creadas entre as institucións públicas e empresas privadas para frear o desemprego xuvenil, e, como neste caso, dentro do mundo dixital, un auténtico nicho de emprego, pois estímase que ata o 2020 en España se creen neste eido 800.000 postos de emprego.

Nesta liña, Lara Méndez lembrou o compromiso do Concello coa creación de emprego, tanto con axudas directas á contratación, como fomentando o emprendemento ou facilitando formación en sectores e profesións de futuro. De feito, o Goberno de Lugo conseguiu nos meses de xullo e agosto máis dun millón de euros para catro proxectos de fomento de emprego, que beneficiarán a máis de 200 lucenses, como o obradoiro TIC Arqueolóxico, o Lugo Cóidate, Empregalia ou dous cursos AFDs; destinando nos dous anos de goberno ao fomento do emprego 3,6 millóns de euros, a pesar de que a administración local non ten competencias neste eido.

Este curso de ciberseguridade supón unha alternativa máis para o Edificio de Novas Tecnoloxías, no que o Concello ofrece, para o que queda de ano, 14 cursos gratuítos con máis de 200 prazas; facturación electrónica, iniciación ás redes sociais, deseño web, marketing ditixial, cracións de Apps ou retoque fotográfico.

Pola súa banda, Menéndez agradeceu o "cariño e cooperación do Concello" con esta iniciativa, que se enmarca dentro dos proxectos educativos, sociais e culturais que ofrece Telefónica nas comunidades onde está operando, a través da iniciativa Emprego Dixital.

Destinatarios, datas e inscricións
Tal e como explicou Joan Cruz, neste curso poderán participar mozos e mozas de Lugo de entre 18 e 35 anos, que terminaran os estudos da ESO, non sendo necesaria formación previa en novas tecnoloxías. O obxectivo é que as persoas inscritas adquiran coñecementos e habilidades que lles permitan incorporar as competencias do mundo da ciberseguridade, unha das especializacións técnicas máis demandadas e con máis futuro no mercado laboral actual.

Trátase dun itinerario formativo nexo de unión entre a demanda real de empresas e o sistema educativo. Inclúe formación teórico-práctica, coa participación de expertos no sector, en temas como o hacking ético, técnicas de proteccións para infraestruturas, contramedidas, entre outras. A maiores, inclúe formación en habilidades para a empregabilidade, como desenvolvemento de intelixencai emocional, traballo en equipo ou como realizar unha entrevista de maneira efectiva.

O curso arrincará o 11 de decembro e terá lugar no Edificio de Novas Tecnoloxías, en horario de mañá, de 08:30 a 14:30 horas. Durará 5 meses, é dicir, ata maio, e como colofón á formación, as persoas participantes poderán presentar os seus proxectos ante as empresas tecnolóxicas máis punteiras da rexión: unha porta para o emprego.

Todas as persoas interesadas en inscribirse deben facelo na páxina web de Fundación Telefónica, no apartado de empregabilidade, ou ben a través da páxina web do Concello, www.lugo.gal.

Audio

• Lara Méndez, sobre o curso gratuíto de ciberseguridade | Descargar mp3

+Info

• Cartel | Descargar pdf