A alcaldesa de Lugo asistiu hoxe á inauguración do XIV Concurso Morfolóxico do Cabalo de Pura Raza Española que este fin de semana se celebra no Pazo de Feiras e Congresos.
A rexedora lucense, Lara Méndez, e o tenente de alcaldesa e concelleiro de Medio Rural, Miguel Fernández acudiron hoxe á inauguración da XIV edición do Concurso Morfolóxico de Cabalo Pura Raza Española, dentro da programación de Equigal.
“Unha cita que, cada ano, converte á nosa cidade na capital do cabalo de Galicia e mesmo de todo o territorio nacional e que consegue atraer a atención non só dos amantes do mundo do cabalo senón tamén do público en xeral”, manifestou Méndez.
A alcaldesa puxo en valor o nivel competitivo do evento, “cunha destacada continuidade que alcanza xa catorce anos de traxectoria e no que temos a oportunidade de desfrutar do talento e das fantásticas habilidades de xinetes e eguadas de renome”, engadiu.
Lara Méndez puxo de manifesto o compromiso do Concello “con Equigal e con todas as iniciativas que, como o Salón do Cabalo de Galicia, representan unha fonte de crecemento e dinamización económica para a cidade”.
O Pazo de Feiras e Congresos acollerá durante toda a fin de semana diferentes actividades deportivas, exhibicións e concursos dedicados ao sector ecuestre. Equigal contará ademais cunha zona infantil e cunha área de exposición e venda de artigos especializados.
