O Concello de Lugo, impulsor do proxecto LIFE Lugo + Biodinámico, organizará o vindeiro sábado, 14 de decembro, a partir das 12.00 horas, unha visita guiada e aberta a toda a veciñanza ao novo pulmón verde da cidade creado nas Gándaras, que finalizará ás 13.00 horas cun  magosto, o primeiro que se organiza nesta zona.

A alcaldesa Lara Méndez convida á cidadanía a participar e a coñecer, da man dos expertos do Campus Terra, os proxectos que alí se desenvolven no marco da estratexia LIFE, coa que Lugo deseña as cidades sostibles do futuro utilizando a madeira como elemento estrutural das edificacións.

Así, está previsto percorrer os diferentes puntos de actuación do proxecto, como o Arboretum de especies autóctonas, a plantación de frondosas para a produción de madeira de calidade, a zona dedicada aos cultivos enerxéticos para a elaboración de biomasa ou a recuperación do humidal e o bosque de ribeira que o rodea, que vai ser declarado ENIL (Espazo Natural de Interese Local). O roteiro finalizará na carpa instalada na zoa do Souto, onde se repartirán castañas entre todas os asistentes.

A rexedora anima a acudir a toda a veciñanza, “é un bo día para desfrutar en familia e amigos, que terá a oportunidade de descubrir verdadeiras xoias da natureza de Lugo así como algúns dos proxectos que están a situar a Lugo como un referente no ámbito europeo”.

Toda esta área de actuacións coñécese coma o novo Pulmón Verde de Lugo, situado entre os polígonos das Gándaras e o Ceao onde, en colaboración co Campus Terra da USC, se está a investigar o potencial da produción de madeira como produto renovable, reciclable, neutro en emisións de carbono, de elevada eficiencia enerxética e de gran calidade para distintas transformacións industriais. O obxectivo deste proxecto LIFE é actuar coma un revulsivo a nivel empresarial e industrial, transformando o modelo económico da cidade e xerando novos empregos verdes.

Como destacou a rexedora de Lugo, Lara Méndez, na presentación que realizou deste proxecto a semana pasada no Cumio do Clima de Madrid (COP25), este novo pulmón verde de 16 hectáreas completa o Cinto Verde de Lugo “xerando un espazo que mellora a calidade do aire da contorna, fomentando a absorción de CO2 e axudando á recuperación de especies de flora e fauna”.

Mediante esta visita o Concello tamén quere impulsar a divulgación das diferentes actuacións vencelladas á bioeconomía que se están a desenvolver no municipio. Con este obxectivo programáronse durante os meses de novembro e decembro uns obradoiros de poda de castiñeiros, de balde e abertos a toda a veciñanza, destinados a calquera persoa interesada en fomentar e mellorar a produción dun dos recursos naturais máis valiosos de Lugo. As inscricións continúan abertas para as quendas do 16 e o 23 de decembro, a través do formulario web www.lugobiodinamico.eu/obradoiropoda

A través do proxecto LIFE Lugo + Biodinámico, o Concello de Lugo está a impulsar un novo modelo de cidade que camiña cara un desenvolvemento urbano sostible, co obxectivo de transformar Lugo nun modelo europeo de cidade resiliente, pioneiro na loita contra o cambio climático. Neste proxecto, o Concello de Lugo está acompañado da Deputación de Lugo e tamén conta co labor de investigación da Universidade de Santiago de Compostela e da Universidad Politécnica de Madrid. Toda a información relativa ao proxecto LIFE Lugo + Biodinámico, as súas actividades e accións de divulgación está recollida na web lugobiodinamico.eu e nos espazos en redes sociais deste proxecto europeo.