Lara Méndez anuncia o visto e prace á urbanización da esquina de San Roque que mellora un enclave con dous Patrimonios da Unesco

A Xunta de Goberno aprobou hoxe, de forma inicial, o proxecto que soluciona as conexións viarias con criterios de perspectiva de xénero.

O impulso dado pola rexedora, promovendo a modificación previa do PEPRI, permitirá eliminar a pasarela, 30 anos despois da súa construción provisional.

Lara Méndez: ”recuperamos un espazo para a cidadanía, conciliando a conservación do patrimonio local coa necesaria dinamización económica do municipio”.

A obra, que dispón dun orzamento de 123.757 euros terá un prazo de execución de seis meses.

Mércores, 19 de maio de 2021
Fonte: 
Gabinete de Prensa
Lara Méndez anuncia o visto e prace á urbanización da esquina de San Roque que mellora un enclave con dous Patrimonios da Unesco

O executivo de Lara Méndez iniciou a conta atrás para recuperar a esquina de San Roque, dignificando unha das principais entradas da cidade ao Casco Histórico.

A Xunta de Goberno aprobaba esta mañá, de forma inicial, o proxecto para urbanizar a mazá do PEPRI 214A, comprendida entre a Rolda, San Roque e o Carril das Flores, que executará a iniciativa privada.

“Unha intervención coa que pretendemos dignificar unha das principais entradas da cidade ao Casco Histórico nun enclave concreto que acolle a dous Patrimonios da Humanidade: a Muralla Romana e o Camiño Primitivo”, explicou a rexedora.

Lara Méndez referiu que “esta solución chega máis de 40 anos despois de que o alcalde lucense nesa época, Jesús Ibañez Méndez, remitise unha providencia aos servizos técnicos municipais instando a buscar unha alternativa para este acceso, e 30 anos despois de que o rexedor Notario Vacas construíse a actual pasarela de metal, que naceu como provisional e que se mantén desde entón”.

“Temos que lembrar, ademais, que aprobación deste trámite é posible porque no mandato pasado, en xaneiro de 2019, conseguimos impulsar a aprobación en Pleno da modificación do Plan Especial de Protección, Rehabilitación e Reforma Interior, que foi imprescindible para desbloquear a situación na que se atopaba esta unidade”, engadiu a alcaldesa de Lugo.

Méndez destacou que “poñemos fin, así, a un longo percorrido burocrático, lastrado en parte polos prolongados procedementos administrativos. Cómpre subliñar que a urbanización que se propón respecta todas as determinacións contidas nos informes dos Servizos Municipais de Enxeñería, Arqueoloxía e Arquitectura, así como as trasladadas pola Dirección Xeral de Patrimonio Cultural da Xunta de Galicia, e que teñen como obxectivo garantir a conservación do Camiño Primitivo ao seu paso polo Carril das Flores. Foi necesario incluso conseguir o permiso do ICOMOS para poder modificar o PEPRI”, afirmou.

A alcaldesa apuntou que “o anuncio da urbanización é unha moi boa nova para Lugo e para a protección da contorna do noso casco histórico e dos dous bens mundiais, polo que implica de acondicionamento dunha contorna tan especial e de resolución das comunicacións tanto peonís como rodadas da zona”.

A actuación implicará a erradicación daqueles espazos que, pola súa configuración actual, resultan insalubres ou entrañan situacións de risco para a veciñanza como pode ser a pasarela de acceso aos establecementos comerciais. Isto reverterá, igualmente, noutros aspectos da seguridade cidadá, de forma especial en horario nocturno, porque a intervención pretende minimizar as consecuencias para a poboación por cuestións de xénero, imbricándoa así no espírito da cidade amable e integradora que persegue o goberno de Lara Méndez.

“As solucións aportadas permitirán que o fluxo peonil da Rolda da Muralla teña a súa continuación cunha beirarrúa de 4 metros de ancho, que actualmente non existe, que conectará co espazo que dá acceso ao edificio lindeiro cara a rúa Montero Ríos. Farase grazas á cesión de terreos por parte da iniciativa privada para mellorar o tránsito peonil”, abondou a rexedora ao tempo que indicou que o tráfico rodado verase tamén mellorado co ensanche da rúa San Roque, ampliándose o ancho dos dous carrís de enlace coa Rolda da Muralla e incorporando un novo viario para o acceso ao Carril das Flores, onde coexistirán o tráfico peonil e rodado restrinxido, cun tratamento de firme diferente ao ser Camiño Primitivo. Neste caso, usarase granito con formigón desactivado, que o que está a preferir Patrimonio”.

Este tratamento diferente prolongarase ata o paso de peóns do inicio de San Roque, para que o acceso rodado sexa máis gradual. Así mesmo, o Carril das Flores terá un ancho aproximado de 6 metros na súa zona máis ampla, e de máis de 4 metros na zona de acceso desde a Rolda da Muralla.

Os muros que se xerarán pola diferencia de cota que vai producir entre Carril das Flores e a Rolda da Muralla revestirase de sillería de pedra ou cunha solución semellante para integralo na súa contorna. O muro do lindeiro do Carril das Flores máis próximo á f