Verónica Lago Franco resultou gañadora do concurso de deseño gráfico sobre Violencia de Xénero, organizado pola Casa da Muller, dependente da Concellería de Muller e Benestar Social, que dirixe Carmen Basadre.

O título da obra gañadora é Elíxete. O cartel centrouse no tratamento deste grave problema entre á mocidade. O obxectivo é facer fincapé na prevención da violencia dirixíndose aos mozos e mozas. A temática do cartel fai alusións a este importante problema entre mozos e mozas pero nun aspecto positivo, sendo elas e eles os que deciden como queren ser, manifestando a idea de tomar decisións libremente, que se queiran a eles mesmos sen coaccións, sen imposicións.

O xurado estivo formado pola Concelleira de Muller e Benestar Social, Carmen Basadre, e persoal técnico da Casa da Muller. Contaron tamén co asesoramento de deseñadoras e deseñadores.

A gañadora do concurso recibirá un agasallo e un premio en metálico dotado con 600 euros.