A edil de Cultura, Turismo e Promoción da Lingua, Maite Ferreiro, presentou no día de hoxe a 19 edición do “Certame de Pintura Rápida ao Aire Libre Cidade de Lugo”. Ferreiro explicou que se trata dunha cita consolidade e referente para moitas persoas que, dende toda Galiza e o resto do estado, se achegan a Lugo para participar cada ano sinalou “este Certame, con case vinte anos de historia, foi posto en marcha cando o BNG tivo responsabilidade de goberno por que xa naquel momento se interpretaba que a actividade cultural e a promoción do turismo na cidade eran compatibles e complementarias”.

O Certame celebrarase o domingo 14 de xullo a partir das 9:00 e os traballados premiados serán coñecidos ás 18:00 horas do mesmo día. As persoas participantes presentaranse entre as 9:00 e as 11:00 horas no Departamento de Cultura do Concello de Lugo para iniciar o concurso e o tempo máximo para a presentación das obras rematadas será o mesmo domingo ás 17:00 horas. Despois da deliberación do xurado, ás 18:00 horas daranse a coñecer as obras premiadas.

As obras premiadas pasarán a ser propiedade do Concello de Lugo que completará así, unha importante colección de arte que se vai configurando ao longo dos anos coa celebración deste Certame. Os premios do Certame suman un total de 5.500 euros que se repartirán en 8 categorías. O primeiro premio recibirá diploma e 1.600€, o segundo premio: diploma e 1.100€, o terceiro premio: diploma e 900€. Tamén haberá cinco accésits de 300€ e diploma e un premio especial de 450€ e diploma para a mellor artista local.