O goberno de Lara Méndez, a través da área de Deportes, investirá 215.077’50 euros na creación dun Skate Park na cidade.

A pista, de 887 m², estará localizada na zona pública existente ao carón do centro comercial As Termas, entre a rúa Veiga Grande e a avenida Fabio Paulo Máximo.

Miguel Fernández explica que “se trata dunha instalación moi completa que servirá para a práctica das dúas modalidades principais do skateboarding: street e park, mantendo unha proporción e relación entre ambos espazos que lle aportará gran flexibilidade e que completarán a polivalencia da contorna que xa dispón de canchas de baloncesto e fútbol así como de varios parques infantís”.

O concelleiro sinalou que “para o seu deseño tivéronse en conta as aportacións dos colectivos locais que nos chegaron as súas propostas e preferencias para, na medida do posible, poder incorporalas ao proxecto”.

Así, os elementos que constituirán o recinto, sendo diferentes, se integran todos nun espazo único e completo, que permitirá aproveitalo no seu conxunto, con liñas de patinaxe para todos os gustos e apto tanto para debutantes como para usuarias e usuarios expertos”, destacou Miguel Fernández ao tempo que trasladou que este novo equipamento municipal estará rodeado por camiños pavimentados peonís e se habilitarán tamén aparcabicis preto dos accesos.

O edil de Deportes referiu que mañá, a Xunta de Goberno, adxudicará os traballos á empresa Roig I Fills Associats por ser a máis vantaxosa das 6 ofertas que se presentaron ao concurso.

“As obras terán un prazo de execución de 16 semanas e, ademais, nos cinco anos de garantía acordados, a propia compañía se encargará, asemade, da conservación da pista, velando polo seu axeitado mantemento”.

Por outra parte, tamén na sesión desta semana, o executivo local aprobará as bases para a concesión das axudas individuais ao talento deportivo. Unhas achegas municipais ás que a área de Deportes dedica 24.441’04 euros e que van dirixidas a deportistas empadroados en Lugo, nados entre 2001 e 2006, que se atopen federados, e que teñan acreditados resultados deportivos durante a pasada tempada.

“Entre os criterios de valoración figura a clasificación obtida tanto nos campionatos de España como de Galicia, así como a superación do curso académico”, indicou o concelleiro ao tempo que lembrou que as persoas interesadas en concorrer á convocatoria terán un prazo de 15 días hábiles para presentar a súa solicitude dende a publicación da mesma no Boletín Oficial da Provincia.

Audio

• O edil de Deportes, Miguel Fernández, sobre a adxudicación do Skate Park | Descargar mp3