A Alcaldesa de Lugo, Lara Méndez, os Concellerios de Deportes e Benestar Social, Miguel Fernández e Ana Abelleira, respectivamente, e o Deputado de Deportes, Pablo Rivera, participaron na Copa Deputación Trofeo Fernando F. Allende, que tivo lugar este domingo no Pazo Provincial dos Deportes de Lugo e no pavillón anexo, e que reuniu a 500 nenos e nenas de entre 7 e 14 anos de preto de 50 equipos de toda a provincia.

A rexedora, os edís e o deputado entregaron os trofeos aos vencedores da competición, que congregou por primeira vez na tempada a todos os equipos da provincia de categoría infantil, alevín e benxamín. Ademais, como novidade nesta edición, incluíuse a categoría de babybasket.

Concello, Deputación e Club de Baloncesto Ensino organizaron este evento deportivo, totalmente gratuíto, para potenciar o baloncesto feminino, a igualdade de xénero e o deporte base.

Homenaxe
A competición rendeu homenaxe a Fernando Fernández Allende, un dos pioneiros do baloncesto feminino na provincia de Lugo e promotor deste deporte entre os mozos lucenses. Ademais de ser adestrador de baloncesto, foi profesor na Facultade de Ciencias da Educación Física de A Coruña e un dos fundadores do CB Ensino.

O evento reuniu a 10 equipos de categoría babybasket mixto, 11 equipos de categoría benxamín mixto, 7 equipos de categoría alevín feminino, 8 equipos de categoría alevín masculino ou mixto, 5 equipos de categoría infantil feminino e 7 equipos de categoría infantil masculino.