O Tenente de Alcalde, Rubén Arroxo, visitou a rúa Quiroga Ballesteros, onde se están a construír as novas zonas verdes da praza peonil. "Estamos a falar dunha das zonas máis importantes da cidade, onde se localizan instalacións históricas como a Praza de Abastos e o Mercado Municipal", afirmou Rubén Arroxo,  que engadiu "desde o Goberno de Lugo melloramos esta zona histórica do centro, gañando todas as veciñas e veciños un importante espazo peonil".

Rubén Arroxo agradeceu "a colaboración da veciñanza e das comerciantes da zona polas molestias que ocasionan este tipo de actuacións, especialmente nas primeiras fases", e destacou tamén "a disposición da empresa e das traballadoras e traballadores para levar adiante este proxecto co mellor ritmo posíbel, tratando de reducir ao máximo as molestias ocasionadas". Os traballos realizados na rúa incluíron a renovación do saneamento, as instalacións eléctricas e o alumeado público, ademais da renovación de rexistros, xunto co o mobiliario urbano para a nova rúa peonil que se está a instalar actualmente.

Arroxo lembrou que "o proxecto ampliouse para mellorar tamén a estética da parte baixa de Santo Domingo". Nesta rúa, actuouse no treito de dobre curva que se atopa pegado á saída do aparcadoiro soterrado, gañando uns 120 metros cadrados de espazo humanizado, sen supoñer un custo a maiores no prezo final da actuación.