O edificio de Novas Tecnoloxías acolleu este venres unha nova reunión dos comités de dirección e seguimento do Life Lugo+Biodinámico, o proxecto de 3,5M€ financiado con fondos europeos que conseguiu o Goberno do Concello e grazas ao que está a desenvolver novidosas iniciativas en favor dun urbanismo sostible e dun mellor aproveitamento forestal, a nivel económico e ambiental, introducindo mesmo un novo modelo productivo a través do uso da madeira como elemento estrutural de construción, o que mellorará a calidade de vida da veciñanza e abrirá novas oportunidades económicas. Entre as actuacións que o Concello impulsa a través deste programa, un dos instrumentos co que o Goberno de Lara Méndez está a materializar o seu modelo de cidade, estase a crear un novo pulmón verde urbano coa plantación de 15.000 árbores de 60 especies distintas en 14 hectáreas de terreos públicos na zona das Gándaras. Ademais, ao abeiro do Lugo+Biodinámico, construirase o primeiro edificio público de Galicia de madeira e que se abasteza integramente de enerxía sostible.