A Alcaldesa de Lugo, Lara Méndez, participou este xoves, xunto á Concelleira de Cultura, Turismo, Xuventude e Promoción da Lingua, Carmen Basadre, no acto de inauguración da nova etapa da Domus do Mitreo como Museo Universitario, xestionado en solitario pola USC, grazas ao convenio de colaboración asinado hai preto dun mes co Concello. Méndez subliñou o “valor engadido” que lle achega a este xacemento arqueolóxico e á cidade o labor docente e investigador da Universidade de Santiago, e máis en concreto do Campus Terra, o que contribúe “a seguir potenciando o gran patrimonio histórico, cultural e artístico co que contamos en Lugo”.

No acto, conducido polo reitor da USC, Juan Viaño, tomaron parte o Presidente da Deputación, Darío Campos, a xefa de Coordinación de Cultura da Xunta, María José Gómez, e o director de zona Santander Universidades, José María García de los Ríos, ademais do Catedrático de Historia Antiga da Universidade Carlos III, Jaime Alvar.

A novas instalacións museísticas, xestionadas integramente pola USC, aínda que de titularidade compartida co Concello de Lugo, terán encomendadas tarefas diversas, que van desde a difusión e valorización dun dos xacementos romanos máis visitados da capital lucense como é o A Domus do Mitreo, e o fomento do patrimonio ata a promoción da cidade de Lugo a través de estudos (docencia) e investigacións (ciencia) sobre a súa historia.