Convidada pola empresa que promove este ámbito de actuación, puido ver como quedaron as actuacións de desdobramento da marxe dereita e da rotonda
A alcaldesa de Lugo, Lara Méndez, e o concelleiro de Urbanismo Sostible, Miguel Couto, visitaron hoxe as obras da Avenida Infanta Elena Duquesa de Lugo que desenvolve a empresa local Avento no ámbito da urbanización que promove no norte da cidade, fronte ao Centro Comercial de As Termas. Convidados pola empresa xa que a execución está xa na súa fase final, percorreron o polígono de actuación, que abarca unha superficie de 24.634 metros cadrados.
Os traballos desenvolvidos foi o desdobramento da marxe dereita da Avenida Infanta Elena, comprendida entre a Glorieta 25 de Novembro e a futura rotonda á altura da residencia de maiores Abeiro God, así como a urbanización da rotonda de xeito que se garante o tránsito rodado e peonil nesta marxe. A actuación tivo en conta o Plan de Mobilidade e de Espazo Público do Concello de Lugo, segundo o cal se executaron beirarrúas con ancho superior a 2,50 metros, carrís con tránsito de bus e vehículos pesados, cun ancho de 3,25 m, carril bici en dous sentidos e a segregación deste carril bici por elementos específicos.
A empresa explicoulle á rexedora que a fin de obra está pendente tan só de pintar as liñas da estrada e do carril bici, aínda que para iso é necesario que deixe de chover e que seque a calzada.
A alcaldesa Lara Méndez lembrou que o polígono, que se divide en catro parcelas, unha delas cedida como propiedade municipal, está moi próxima ao futuro Barrio Multiecolóxico de Lugo e á parcela que acollerá o edificio Impulso Verde, “proxectos vinculados co programa LIFE que promovemos e que creará un foco atractivo de actividade nesta zona”.