O Concello de Lugo organiza para o vindeiro venres, 20 de novembro, o segundo dos tres talleres que, baixo o nome de A Aventura de Diana: Emprendendo e Innovando Contra Vento e Marea, pretende fomentar e capacitar a innovación e o emprendemento dos lucenses. Este obradoiro, que dá resposta ás peticións veciñais dos Orzamentos Participativos, está dirixido ás mulleres empresarias e terá lugar no Salón de Actos do CEI-NODUS, dende as 16:00 ás 19:30 horas. O primeiro destes talleres, que se celebrou o pasado luns 9 de novembro, contou con 80 alumnos e alumnas dos institutos Muralla Romana, Leiras Pulpeiro e A Nosa Señora dos Ollos Grandes.

Todas as mulleres empresarias interesadas en participar poden inscribirse no enderezo electrónico empresariaslugo@gmail.com ou chamando ao 982-22-69-91. As prazas son limitadas. O terceiro e último obradoiro, dirixido a desempregados, levarase a cabo o 18 de decembro, ás 11:00 horas.

Nacho Villoch, experto en innovación e emprendemento, é o encargado de impartir este taller, no que se recollen máis de 60 conceptos, referencias, ferramentas e aprendizaxes sobre innovación e emprendemento, baseados nunha novela orientada a asesorar aos emprendedores. A través dun storytelling, Villoch narra unha viaxe de exploración e descubrimento coas vicisitudes que todo emprendedor atopará no seu proxecto. Na sesión entregarase gratis o libro e manual La aventura de Diana a todos os participantes.