O Concello abre o prazo de presentación de traballos para o premio de deseño gráfico do segundo CD da Escola Municipal de Música. Trátase dun certame para deseñar a portada do disco no que os nenos e nenas galardoadas recibirán un premio de material musical, valorado en 220 euros.

A Concellería de Educación aposta por levar a cabo este tipo de concursos nos que os cativos e cativas poden desenvolver as súas capacidades máis artísticas e creativas achegándoos á música dun xeito lúdico.

No concurso poderán participar rapaces e rapazas dos centros educativos de Lugo, dende os 4 aos 12 anos, con traballos de técnica libre, presentando o número de obras que consideren oportunas, coa condición de que sexan orixinais. Nesta liña, poderase presentar o alumnado da Escola Municipal de Música, sempre e cando non formen parte do xurado.

Os deseños serán principalmente gráficos no que non se incluirá texto, nun formato DIN A4 que deberán entregarse sen enmarcar en calquera tipo de papel soporte, dun xeito anónimo, con lema e acompañado dun sobre cos datos da persoa participante. Os interesados e interesadas en concursar poden presentar os seus traballos por correo ou persoalmente na Escola Municipal ata o 31 de maio.

Premios e xurado

No certame establécense dous premios, un para o alumnado dos centros educativos e outro para o alumnado da Escola Municipal de Música, ambos galardóns valorados en 220 euros en material musica. Os deseños que resulten gañadores figurarán ou ben na portada do CD ou na galleta do disco.

O resto de obras non premiadas devolveránselles ás e ós participantes que o soliciten e poderase dispoñer dunha selección de traballos para a realización dunha exposición.

O xurado do certame estará formado por persoas cualificadas na materia, representantes do profesorado e representantes do alumnado.

Audio

• Carlos Méndez, sobre o segundo CD | Descargar mp3

Máis info

• Decreto sobre as bases do Concurso de Deseño Gráfico - CD ESMU | Descargar pdf