O Alcalde accidental, Luis Álvarez, e a Concelleira de Benestar Social e Igualdade, Ana González Abelleira, recibiron esta mañá á xornalista e directora de cine Oliva Acosta, que presenta o seu documental Las Constituyentes en Lugo, dentro das actividades do Día Internacional da Muller.

Oliva Acosta explicou que “este documental versa sobre as 27 mulleres, deputadas e senadoras, que dende o seu traballo parlamentario na lexislatura constituínte de 1977, foron protagonistas do cambio político cara a democracia en España.” Así, a través da experiencia persoal destas pioneiras, nárrase unha parte da historia da participación política das mulleres en España, analizando a situación actual das mulleres en política. Estas mulleres accederon ao Congreso e Senado español tralo periodo franquista, nas eleccións democráticas do 15 de xuño de 1977, e participaron na elaboración da Constitución Española de 1978, defendendo activamente a igualdade dos dereitos entre homes e mulleres na sociedade española.