O Concelleiro de Medio Ambiente, Lino González Dopeso, anunciou hoxe a creación dunha Comisión para estudar a xestión integral do ciclo da auga. A Comisión estará formada polo Alcalde e os concelleiros de Medio Ambiente, Economía de Infraestruturas, de diferentes servizos técnicos municipais e por representantes dos grupos políticos do Concello.

A proposta será debatida na vindeira sesión do Pleno municipal e o seu obxectivo é unificar a xestión de todo o ciclo da auga, co fin de optimizar os recursos e mellorar a xestión deste servizo, segundo declarou o Concelleiro de Medio Ambiente.

González Dopeso explicou que, na actualidade o Concello xestiona directamente o sistema de abastecemento mentres que a xestión do saneamento faise de xeito, a través dunha empresa. “Dado que os contratos coa empresa que leva o saneamento acaban o vindeiro ano, consideramos que este é o momento de pensar que forma é a que máis lle convén ó Concello para poñer en práctica a xestión integral da auga”, sinalou González Dopeso, quen lembrou que “o PSOE sempre apostou pola fórmula dunha empresa mixta na que teña maioría o capital municipal”.

Tamén manifestou que o obxecto desta proposta “é mellorar o modelo de xestión, unha vez que temos mellorado moito a calidade da auga”. Trátase de buscar a mellor forma de xestión do ciclo integral da auga, o que redundará en beneficio dos usuarios, asegurou o Concelleiro de Medio Ambiente.

Lino González sinalou ademais que “agora contamos cunhas novas infraestruturas que empregan tecnoloxías que tamén son novas e, polo tanto, requiren dun coñecemento máis especializado”.